‘Atera hatza, itzuli seguru – Saca el dedo, vuelve segura’ da ekintza honetarako hautatutako leloa. Metroaren pantailetan, sare sozialetan eta udal-euskarrietan ikusi ahal izango da, herritarrak doako aplikazioa deskargatzera animatzeko eta, behar izanez gero, erabiltzeko. Beldurrik ez! 2019an jarri zen abian, eta Udalak haren erabilera eta ezagutza sustatu nahi ditu uda hasten denean eta Karmenak iristen direnean.
Atera hatza, itzuli Seguru da Barakaldoko Udaleko Emakumeen Arloak aukeratu duen leloa, Beldurrik ez! doako aplikazio mugikorra sustatzeko. 2019an sortu zen, eraso matxistak prebenitzeko helburuz, herritarrei Udaltzaingoarekin zuzenean eta segurtasunez konektatzeko tresna bat eskaintzeko. Pandemian bi urte eman ondoren, berriz ere kaleak, jaiak… berreskuratzen ari gara. Une honetan, gure ustez, gogoan izan behar dugu Barakaldon aplikazio propio hori dugula, eta, modu errazean, poliziari abisatzeko aukera ematen digula segurtasunik eza sentitzen badugu edo eraso matxista jasan badugu. Horregatik, kanpaina hainbat formatutan abiarazi nahi izan dugu, haren erabilera sustatzeko, Barakaldoko alkate Amaia del Campok adierazi duenez.
Beldurrik Ez aplikazioa udal-langileek sortu zuten Barakaldo APPren aterkipean, eraso sexista bat jasanez gero edo segurtasunik gabe sentituz gero, Udaltzaingoarekin zuzeneko komunikazio-kanal bat emateko. Erabat doakoa da, eta oso intuitiboa eta erabilerraza. Android sistemarako zein IOS sistemarako deskarga daiteke.
Hainbat funtzio ditu, eta horietako nagusia izu-botoia da. Orrialdearen zati nagusian dago, eta eraso sexista bat jasaten ari dela ohartarazi ahal izateko pentsatuta dago. Sakatzean, Udaltzaingoak patruila bat bidaliko du alerta jaso duen tokira. Aplikazioak izu-botoiko deia ezeztatzeko aukera ere ematen du, alarma faltsua izan bada. Horretarako, «Utzi» botoia sakatu behar da, eta, horretarako, sistemak sartzeko pin zenbakia eskatuko du.
2019an abian jarri zenetik, aplikazioak 500 deskarga lortu zituen. «Beldurrik ez! 2019ko uztailean hasi zen erabiltzen, eta hilabete batzuk geroago iritsi zen pandemia, eta guztiak egon ginen etxean itxita. Egia esan, uste dugu tresna erabilgarria dela, eta aukera ematen diela emakumeei gauaz, kaleaz eta jaiez gozatzeko, eta bermatzen duela, botoi hori sakatzen badugu, larrialdi-zerbitzuek gure abisua jasoko dutela eta lagunduko digutela», azaldu du Del Campok. «Ez genuke zertan izan horrelako aplikaziorik, baina, gaur egun, oraindik ere beharrezkoak dira», azpimarratu du.
Beldurrik ez! sustatzeko kanpaina hori abian jartzea da, datorren larunbatean, uztailak 9, hasiko diren Barakaldoko Karmenak ospatzeko Udala bultzatzen ari den ekimenetako bat. «Oso jai bereziak izango dira, guztiok dugu haiek gozatzeko gogo handia, eta uste dugu inoiz baino beharrezkoagoa dela errespetuari, berdintasunari eta indarkeria matxistaren aurkako borrokari buruzko kontzientziazio-kanpainak egitea», azpimarratu du alkateak. «Horregatik animatzen ditugu gure bizilagunak Beldurrik ez! jaitsaraztera, segurtasunagatik eta lasaitasunagatik. Aplikazioa deskargatzen minutu bat emateak jai hauetan eta hemendik aurrera ere lasaiago egotea», esanez amaitu du.
