POLITICA ESPAÑA EUROPA PAÍS VASCO
AYUNTAMIENTO DE BARAKALDO
Gorostitzako parkean komun publiko bat dago dagoeneko. Horixe zen, hain zuzen ere, Barakaldoko birikaren bihotzean zegoen aisialdi-eremu horren erabiltzaileen eskarietako bat, eta Covidaren ondorioak arintzeko Partaidetzazko Aurrekontuen aurreko edizioan boto gehien jaso zituen proposamenetako bat izan zen. Komun publiko berria Gorostitzako kiroldegitik hurbilen dagoen eremuan jarri da.
Barakaldarrek, beren ideien artean, hirian bainugela publikoak jartzea proposatu zuten. «Pandemiarekin denbora gehiago eman genuen aire zabalean, eta aurrekontu parte-hartzaileetan planteatu zuten aukeretako bat izan zen, hain zuzen ere, hirian bainugela publiko gehiago izatea, gune itxietan sartzea saihesteko», gogorarazi du Jon Andoni Uria Auzoetarako eta Hirirako Obra eta Zerbitzuetako zinegotziak.
Zerbitzu berriak, kanpoaldeko alde batean, altzairu herdoilgaitzezko hiru pixatoki autogarbigarri ditu, lurrerainokoak, eta material bereko babes-bereizgailuak. Guztiz egokitutako bainugela da mugikortasun urriko pertsonentzat. Barrualdea eta kanpoaldea gresite baldosa beiraztatuz estalita daude. Bai edukierak bai barruko elementuek bandalismoaren aurkako elementuak eta altzairu herdoilgaitzezkoak dituzte.
Komunean honako hauek daude: komuna, papera ez lapurtzeko sistema duen komuneko paper-banagailua, ur-fluxua automatikoki eteteko sistema duen konketa, kontsumo baxuko esku-lehorgailu elektrikoa eta xaboi-banagailua, esekitokia eta ispilua, desgaituentzako laguntza-barrak, pixoihalak aldatzeko mahaia, girogailua eta komuna erabiltzeko geratzen den denbora adierazten duen erloju digitala. Segurtasun-arrazoiak direla eta, ez dago paperontzirik.
Gainera, komunaren barruko berokuntza termostato batek kontrolatzen du tenperatura erosoa mantentzeko.
Dagoeneko instalatuta daukagunez, gozatu egin behar dugu, eta, batez ere, urte askoan gure hirian hain erabilia den aisialdi-eremu horretan zerbitzua eman ahal izateko zaindu.
