Barakaldoko hiri-autobusak, Kbusak, alegia, abantaila berriak ditu gaur egun erabiltzaileentzat. Zehazki, gaur goizean, Barakaldoko autobusa erabiltzen dutenek Bidai 50, Bidai 70 eta Bidai Oro bonu multimodalak erabili ahal izango dituzte, bai eta gazteei zuzendutakoak ere: Gazte 70 eta Gazte Oro. Orain arte beste garraio publiko batzuetan (adibidez, metroan) erabil zitezkeen bidaia-paketeak dira, eta gaur bertan jarri dira indarrean Kbusen, neurri hori uztailean onartu izanari esker.
Osoko bilkura horretan, halaber, Kbusaren tarifak erdira murriztea onartu zen, eta Gobernu zentralak garraio publikoaren erabiltzaileei zuzenean laguntzeko bultzatutako ekimenari atxiki zitzaion. Neurri horren ondorioz, % 50 murriztuko da Barik, Gizatrans eta Hirukotrans motako diru-txartelekin eta bono multimodalekin ordaintzen den bidaiaren kostua, eta, oro har, gaur jarri da indarrean, eta abendura arte egongo da martxan.
Hala ere, Kbusen neurria irailaren erdialdean jarriko da indarrean, administrazio-izapideak direla-eta Barik, Gizatrans eta Hirukotrans-ekin egindako bidaietarako. «Neurria uztailaren amaieran iragarri zitzaien udalei, eta prozesua ahalik eta gehien bizkortu bazen ere, osoko bilkuraren gai-zerrendan puntu hori lehenbailehen onartzea sartu zen, lehenbailehen indarrean jarri ahal izateko, eta tasa baten aldaketa denez, izapidea orain jendaurrean dago eta irailaren 16an jarriko da indarrean», adierazi du Gorka Zubiaurre Alkatetzako zinegotziak. Bonu multimodaletako deskontuak, ordea, eraginkorrak dira, Bizkaiko Garraio Partzuergoaren tarifa baita.
BIZILAGUNENGANDIK GERO ETA HURBILAGO DAGOEN KBUS
Kbus hiri-autobusak hainbat hobekuntza izan ditu azken lau urteetan. Flota ibilgailu iraunkorragoekin – elektrikoak eta hibridoak – berritu zen, eta ibilbidea luzatu egin zen, hiri-garraioa erdigunetik urrunen zeuden auzoetaraino (Burtzeña, Kastrexana edo Kadagua) eramango zuen linea berri bat sortuz. Berriki, auzo horietako bidaien maiztasuna handitu egin da, eta Kbusaren araudia berritu egin da, erabiltzaileei abantailak dakarzkien berrikuntzak erantsiz, hala nola adingabeek 6 urtera arte billeterik ez ordaintzea; 8 kilo baino gutxiagoko maskotak sartzea transportin beharrik gabe; erdigunean bizikletaz sartzeko aukera; eta irisgarritasuna hobetzea, besteak beste.
