Ertzaintzak ikertu gisa eginbideak ireki dizkie sei txakurren bi jaberi Arabako Urizaharra herrian, animaliek ez zutela arretarik jasotzen egiaztatu ondoren, desnutrizio-sintomak eta gorputzean zauriak baitzituzten, eta, gainera, katez lotuta baitzeuden eta ezin baitziren askatasunez mugitu. Sei txakurrak hartu eta animaliak babesteko erakunde baten eskuetan utzi dituzte.
Ertzaintzaren baliabide batek joan den astean aurkitu zituen ehizako txakurrak, Urizaharrako bide batean zihoazenean animalien uluak entzun baitzituzten. Ertzainak hurbildu zirenean, txakur batzuk ikusi zituzten metalezko kateekin plastikozko etxola batzuei lotuta, eguzki begitan eta ia urik eta janik gabe, eta higienerik eza ere nabaria zen. Animaliak oso argal zeuden, eta lesioak zituzten azalean eta gorputzean.
Agenteek txip-irakurgailu batekin identifikatu zituzten txakurrak, eta jabeei jakinarazi ondoren, agintari eskudunekin harremanetan jarri ziren animalien kargu egin zitezen. Ertzaintzak egindako kudeaketen ondorioz, polizia-atestatu bat instruitu da animaliak abandonatzea leporatuta, eta atestatuan bi pertsona daude ikerketapean.
Sei txakurrak animaliak babesteko erakunde batera eraman zituzten albaitariak arreta emateko eta, ondoren, bertan babesteko.
Etxeko animaliak babesteko araudi berria Euskadin
EHAAn orain dela gutxi argitaratu da ekainaren 30eko 9/2022 Legea, Etxeko animaliak babesteari buruzkoa, eta animalien osasunari eta animaliak edukitzeari eta merkaturatzeari buruzko babes osoa planteatzen du. Araudi berri honek ezartzen du administrazio publikoek animaliak babestea, zaintzea eta errespetatzea, animaliei tratu ona ematea eta animaliak abandonatzearen eta animalien aurkako edozein eratako tratu txarren aurka borroka egitea sustatu behar dutela.
Legeak animalien arduradunen edo titularren betebeharrak ere azpimarratzen ditu: behar bezala zaintzea eta mugitzeko askatasuna bermatzea, eusteko sistema iraunkorrak saihestuz; ura eta elikadura egokia ematea; higiene- eta osasun-baldintza onetan mantentzea eta aterperako bizitoki egokia ematea; eta behar dituzten albaitaritzako tratamendu prebentiboak ematea.
