Bartzelonan egingo den Frantziako eta Espainiako goi-bileraren baitan, Pirinioetako mugan partekatutako arazoei irtenbide bateratuak bilatzea aldarrikatu du PLEk
Pirinioetako Lan Elkartea (PLE) mugaz gaindiko partzuergoa da, eta lurraldea garatzeko eta bertako biztanleen bizitza hobetzeko egiten du lan.
Pirinioetako zazpi lurralde mugakidek osatzen dute PLE / CTP: Euskadi, Nafarroa, Aragoi, Katalunia, Akitania Berria, Okzitania eta Andorra.
Pirinioetako Lan Elkarteak mahai gainean jarri ditu Pirinioetako biztanleek egunero bizi dituzten muga-arazo eta -oztopoak, gaur goizean Bartzelonan egingo den Frantzia-Espainia goi-bileraren harira. Hala, Urkullu Lehendakariak, PLEko lehendakari gisa, gutun bidez helarazi dizkie Pedro Sánchez eta Emmanuel Macron presidenteei azaroaren 30ean Arantzazun egindako 40. Osoko Kontseiluan onartutako adierazpenaren aldarrikapenak.
Adierazpen horretan aldarrikatzen dira, besteak beste:
Frantziako agintariek 2021eko urtarriletik blokeatuta dituzten mugako pasabideak ireki beharra. Aldarrikapen horren aldekoak dira, zeharo, mugaz haraindiko guneko eragileak, inplikatuta baitaude eta ondo baitakite beharrezkoa dela mugaz haraindiko herritartasun erabat integratu baten eraketan sakontzen jarraitzea.
Mugaz Gaindiko Lankidetzako Europako Mekanismoa (ECBM) zehaztu eta aplikatzeko premia saihestezina, Pirinioez gaindiko lurraldeak aurre egin beharreko lege- eta administrazio-oztopoak konpontzeko lagungarria izango den baliabide gisa. Nola Espainiako eta Frantziako estatuei hala Europako Batzordeari bide hori jarraitzeko eskatzen zaie, eta adostasuna lortzen saiatzeko.
Babestea, batetik, energia-horniduraren jatorriak dibertsifikatzen lagunduko duten Pirinioez gaindiko azpiegituren garapena, eta bestetik, energia-iturri berriztagarrien bidez (hidrogeno berdea eta biometanoa, esate baterako) deskarbonizazioa sustatzea. Gainera, Osoko Bilkurak eskualdeak eta autonomia-erkidegoak erabakiak hartzeko prozesuetan sar daitezela eskatzen du.
Pirinioez gaindiko lankidetza-protokolo bat bultzatzeko bere konpromisoa, hidrogeno berriztagarria sustatzeko, hidrogenoaren ekonomia hedatzeko mugaz gaindiko espazio bat sortze aldera, lurraldeen posizionamendua indartuta eta Estatuko eta Europako estrategietan ezarritako deskarbonizazio-helburuak lortzeko aukera emanda.
PLEko kideek uste dute Espainiako eta Frantziako gobernuen arteko bilera aukera bikaina dela gai horien inguruan bi estatuen arteko harremanak sendotzeko, eta adierazi dute prest daudela, bakoitzak bere eskumenetik, Pirinioetako lurraldeen lehentasunetan aurrera egiteko eztabaidan eta lankidetzan aritzen laguntzeko.
Garapen bateratu eta jasangarri baten alde elkarrekin
Pirinioetako Lan Elkartea (PLE) nazioarteko partzuergoa da, Pirinioetako mendigunea garatzen laguntzeko helburu nagusia duena, haren erronkak kontuan hartuta, haren aberastasunak zainduz eta lurraldeen arteko lankidetza sustatuz, bereziki, bere lurraldeetako biztanleen bizitza hobetzeko mugaz gaindiko lankidetza.
PLEko kideak Pirinioetako lurraldeak dira: Akitania Berria, Okzitania, Katalunia, Aragoi, Nafarroa, Euskadi eta Andorrako Printzerria.
PLE 1983an sortu zen, Europako Kontseiluak lagunduta. Europako Kontseiluak Pirinioetako eremua mugaz gaindiko lankidetza-egituraz hornitu nahi du, Europako beste muga batzuetan daudenen antzera.
2005ean, PLE partzuergo bihurtu zen, Espainiako zuzenbide publikoari lotutako erakunde juridiko, eta beste bultzada bat eman zion esku-hartzeari dagokionez, batez ere funtsen kudeaketaren eta Interreg VI-A Espainia-Frantzia-Andorra (POCTEFA 2021-2027), POCTEFA 2014-2020 eta POCTEFA 2007-2013 programen esparruan
