- Elena Pérez Barredok berretsi du bere Sailak, “beste gatazka guztietan bezala, akordioak errazten dituela, hala eskatzen bazaigu”
Eusko Jaurlaritzako Lan eta Enplegu Sailak ospatzen du Txorierrin errepideko garraioaren zerbitzu publikoa ematen duen Vectalia Bizkaibusen gatazkan dauden alderdiak akordio batera iristeko gai izan direla zailtasun guztiak gainditu ondoren, eta prozesu horretan “ahalegin osoa egin dugu eskatu zaigun bitartekaritzaren bidez puntu komunak aurkitzeko”.
Vectaliako gatazka zen Bizkaibusen konpontzeke zegoena, aurreko asteetan Bizkaiko garraio publikoaren emakida zuten beste enpresa batzuen akordioak itxi ondoren. Kasu honetan, Lan eta Enplegu Sailaren bitartekaritza eskatu zen. Haren proposamena aintzat hartu zen joan den astean plantillen gehiengoaren bozketarekin, eta gaur goizean amaitu da, Eusko Jaurlaritzaren Bilboko egoitzan sinatuta.
Idoia Mendia Lehendakariordeak zoriondu egin ditu alderdi negoziatzaile guztiak, Bizkaiko errepideko garraio-zerbitzu publikoaren enpresa emakidadunek eta sindikatuek lortutako akordioa sinatu ostean.
Bestalde, Elena Pérez Barredo Lan eta Gizarte Segurantza sailburuordeak sinaduraren ostean adierazi duenez, “beste behin ere agerian geratu da negoziazio kolektiboa eta akordioa dela tresnarik onena enpleguari eta langileen eskubideei eutsiko zaiela bermatzeko, bai eta enpresen bideragarritasuna bermatzeko ere”.
