2022an fakturazio-zifrak % 20 handitu ondoren, Kidek instalazioak zabaltzearen eta digitalizatzearen aldeko apustua egin du, etorkizuneko erronkei aurre egiteko. Guztira 7 milioi euroko inbertsioa eginda, ekoizpen guztia Berriatuan (Bizkaia) zentralizatzea erabaki dute, Kunshan (Txina) eta Arronako (Gipuzkoa) lantegiak atzean utzita, eta 2.800 metro koadro baino gehiagoko handitzea ere egin dute. Era berean, dagoeneko hasi da barne-sistema eta ekoizpen-prozesua digitalizatzeko prozesuarekin, funtsezko zutabea baita Mondragon Korporazioan integratutako kooperatibaren etapa berri honetan.
“Egungo merkatu-parametroetan, prezio doituekin, gurea bezalako sektore heldu batean, tokiko lehiakide askorekin, ez du zentzurik Txinan jarraitzeak”, azaldu zuen Mario López Kideko zuzendari nagusiak, iaz, aldaketa abian jarri zenean. Izan ere, kooperatibak 45 urte baino gehiago daramatza hotz ganberak, panel isolatzaileak, hozkailu ateak, hotz ekipamenduak eta lehortegiak fabrikatzen, eta Europa osoko, Hego Amerikako eta Asiako herrialdeetara esportatzen du. “Urte hauetan guztietan, gure nortasun-ezaugarriak kalitatezko zerbitzua, hurbiltasuna eta erantzuteko azkartasuna izan dira, eta horiek izaten jarraitu beharko dute enpresaren balio bereizgarri nagusiak”, azpimarratu du.
Filosofia horrekin amaitu berri du Kide enpresak Europan egin duen azken lanetako bat: Oslo, Kopenhage eta Stockholmeko aireportuetako hotz-sistemen eta hotz-ganberen instalazioa. “Bezeroaren beharretara egokitu behar dugu, eta behar duten horretan jarri behar dugu arreta beti. Kidek oso ondo jakin du harreman hori ia bere historia osoan zehar garatzen. Gure balio bereizgarri nagusia da. Bezeroak zer nahi duen jakitea, bere beharretara egokitzea eta bere eskaerei kalitatez eta hurbiltasunez erantzutea”, dio Lópezek.
Berrikuntzaren saria
Berrikuntzaren aldeko apustuak eta bere lurraldearen, Bizkaiaren, aldeko erabaki irmoak, Berriatuan instalazio berri hauek martxan jartzearekin, ON Bizkaia 2023 berrikuntza eta hazkunde proiektu onenaren saria eskuratzeko balio izan diote Kideri. “Oso harro gaude. 160 pertsona baino gehiagoko lantaldea dugu, horietatik % 90 Lea Artibai eskualdekoak. Zalantzarik gabe, horiek guztiak dira egunez egun hazten eta eboluzionatzen jarraitzeko aukera ematen diguten motorrak”, zuzendari nagusiak adierazi duenez.
Ildo horretan, Eusko Jaurlaritzaren finantziazioa ere jaso du, Hazitek enpresa-arloko I+Gri laguntzeko laguntza-programaren bidez, Berdia proiektua garatzeko. Horri esker, Kidek “I+G ildoa hobetzen jarraituko du hozteko ekipoetan, gero eta zorrotzagoa den merkatu batean horien lehiakortasuna sustatuz”, amaitu du Lópezek.
SPRI Taldearen helburuetako bat euskal enpresen eraldaketa digitala da. Besteak beste, Basque Industry 4.0, BDIH Konexio, Zibersegurtasun Industriala, Enpresa Digitala edo Inplantalariak laguntza-programen bidez bultzatzen du.
