Osakidetzako Gurutzetako Unibertsitate Ospitaleko Urologia Zerbitzuak pazienteei egiten dizkien ebakuntza kirurgikoen kalitatea hobetu du, Da Vinci robot kirurgikoaren eta holmiozko laser bidezko prostata-enukleazioaren (HOLEP) azken bertsioari esker. Bi teknologia horiei esker, interbentzio konplexuagoak eta eraginkorragoak egin daitezke, eta pazienteengan duten eragin interbentzionista txikitu. Horrela, operazio ondokoak laburragoak izatea eta bizi-kalitate hobetzea lortzen da.
Guztira, ekipamenduak eskuratzeko 2 milioi eurotik gorako inbertsioa egin behar izan da; 1,95 milioi euro Da Vincirako eta 182.000 euro holmio laserrerako.
Da Vinci: Robotak lagundutako kirurgia laparoskopikoa
Ivan Olano doktorearen esanetan: «Da Vinciren belaunaldi berriak honakoak ekarri dizkigu: eremu kirurgikoaren ikuspegia hobetzea, ekografia endokabitarioa egiteko aukera eta azken belaunaldiko elementu robotikoak erabiltzea, hala nola zigilatzaileak edo endograpagailuak. Konplexutasun handiko kirurgiak egin ditzakegu, eraso eta odol-galera minimoekin, eta operazio ondokoa hobea izatea lor dezakegu. Bertsio berriak barrunbe txikietako kirurgien emaitzak optimizatzen ditu, eta jauzi kualitatibo bat ekarri du, batez ere zistektomiak egitean eta kokapen geografiko zaila duten giltzurruneko tumorektomietan. Bere teknologiari esker, oso koagulazio ona lortzen dugu, eta organoak zehaztasun handiz maneiatzen ditugu, ez daitezen kaltegarriak izan».
«Da Vinciren seigarren belaunaldia interbentzio kirurgikoetan erabiltzeak pazienteengan duen eragina oso positiboa da. Prostatektomia baten ondoren, pazientearen bizi-kalitatea hobetu egiten da, gernu-inkontinentziaren arazoak % 95 murrizten direlako, eta, ondorioz, oihal xurgatzailetan, pixoihaletan eta gizonezkoen inkontinentziaren aurkako gailuetan aurrezten dutelako».
Urologia zerbitzuak egunero erabiltzen du sistema, astelehenetik ostiralera eta, prozedura-motaren arabera, egunean gutxienez bi prostatektomia egiten ditu, zistektomiarik ez dagoenean programatuta soilik, horrek goizeko lanaldi osoa eskatzen baitu. Urologiak, gainera, erreferentzia robotiko gisa jarduten du prostatako minbiziaren kirurgian Bizkaiko eremu zabal batean (Bilbon izan ezik), Burgosen eta Kantabrian.
HOLEP (holmio bidezko prostata-enukleazioa) – Holmiozko laserra
Holmio laserrak igortzen duen energia motak ehuna askoz gutxiago erretzen du, eta funtsean bi lan-ildotarako ezarri da. Alde batetik, litiasien («harriak») gainean jarduteko, harria bere potentziari esker hausteko erabiltzen duen zehaztasuna, haustutzea eta azkartasuna hobetuz, eta, hala, kirurgia konplexuagoak egiteko aukera ematen du. Bigarren ildo gisa, kirurgia prostatiko onbera bide endoskopikotik egiteari dagokionez, gehien ezarritako eta HOLEP (holmio bidezko prostata-enukleazioa) deituriko aukera gisa gailendu da.
Francisco Cáceres doktorearen hitzetan: «Teknika honek kirurgia irekirik gabe adenomektomiak eta antzeko interbentzioak egiteko aukera ematen digu. Beraz, ez da beharrezkoa pazienteari zauriak egitea, kirurgia osoa uretraren bidez egiten baita. Horri esker, ebakuntza ondokoak laburragoak dira, 24 eta 48 ordu bitartekoak, altak lehenago ematen dira eta pazienteen % 95 zundarik gabe joaten dira. Halaber, patologia anitzeko pazienteei eta denbora luzez zunda daramatenei operatzeko aukera ematen du. Zunda denbora luzez eramateak infekzioak eragiten dizkie eta behin eta berriz ospitaleratu behar izaten dute. Era berean, hemostasia hobeto kontrolatzeko aukera ematen du antikoagulatuta dauden pazienteetan».
«Pazienteei bizi-kalitatea ematen die. Adibidez, paziente gazteek, epe luzera, askoz hobeto egingo dute pixa. Teknika horrek berriz errepikatzeko aukera murrizten du, prostata-ehun gehiago kentzeko aukera ematen baitu. Esan daiteke HOLEPek behin betiko ordezkatu duela prostatako hipertrofia onberaren kirurgia irekia. Ez dago harekin aldera daitekeen teknikarik epe luzeko emaitzei dagokienez».
Bi teknologia horiek ezartzeak aldaketa ebolutibo garrantzitsua ekarri du Urologia zerbitzuko jarduera kirurgikoan: kirurgien % 80an erabiltzen da. Gainerakoa giltzurruneko transplanteak hartzen du.
