Europar Batasuneko eta Kanpo Harremanetako idazkari nagusia Itsas Eskualde Periferikoen Konferentziak egun hauetan Florentzian egiten duen Buro Politikoan parte hartzen ari da, Arku Atlantikoko Batzordeko euskal presidentearen ordezkari gisa.
Zehazki, Itun Berdearen Industria Planari eskainitako saioaren buru da Marian Elorza. Saio horretan planaren ezaugarri nagusiak azalduko ditu, bai eta Zero Emisio Garbien Industriaren Legearenak ere, eta industria-klusterrek dituzten beharrak eta itoguneak azpimarratuko ditu. Planaren eta Legearen helburua da 2030erako berotegi-efektuko gasen emisioak % 55 murriztea eta 2050erako klima-neutraltasuna lortzea.
Bere hitzaldian, Eusko Jaurlaritzaren ordezkariak adierazi du, azkenean, asmo hori ez dela helburuen araberako finantza-pakete batean islatu. Batzordeak teknologia garbien finantzaketa bultzatu nahi du, Estatuaren laguntzei buruzko arauak lasaituz eta uda baino lehen Europako Subiranotasunerako Funtsa sortuz. Azaldu duenez, lehenengoak zalantzak eragiten ditu, eta bigarrenak teknologia garbietarako trantsizioaren finantzaketa komunitarioa areagotu lezake EB osoan, estatuko laguntza-erregimenek eragindako merkatu bakarraren zatiketa saihestuz.
Era berean, EBko eta Kanpo Harremanetako idazkari nagusia itsasoko energia berriztagarriak zero isurketa garbiko teknologia estrategiko gisa sartzearen alde agertu da, potentzial handia dutelako Europako trantsiziorako eta energia-segurtasunerako, baita itsas eskualdeen industria-garapenerako ere.
Elorzak argi utzi du Planean ez dagoela erreferentziarik eskualdeek, espezializazio adimenduneko estrategiek eta kluster-politikak Europako balio-kateak sortzeko eta indartzeko eta, horrela, proposamenaren helburuak lortzeko duten zereginari buruz.
Azkenik, azpimarratu du portuek eginkizun estrategikoa dutela Europa klimaren aldetik neutroa izaten laguntzeko, energia berriztagarrien bideratzaile eta ekoizle gisa eta jarduera asko deskarbonizatzeko funtsezko eragile gisa, itsas garraiotik hasi eta industria-klusterretara arte.
