Eusko Jaurlaritzako Turismo, Merkataritza eta Kontsumo sailburu Javier Hurtadok MICE turismoaren (Bilerak, Pizgarriak, Kongresuak eta Ekitaldiak) balioa eta lurraldeei uzten dien ondarea azpimarratu ditu, turismoaren sektorea suspertzeko bide bikainean dagoela ziurtatuz.
Hurtadok Turismo, Merkataritza eta Kontsumo Sailak eta Basquetourrek antolatutako «Let ‘s MICE» jardunaldia inauguratu zuen Bilbon, azoka eta kongresuetako MICE turismoko profesionalentzat.
Sailburuak gogorarazi zuen turismoaren sektorea, eta bereziki MICE sektorea, izan zela pandemiak gehien kaltetu zuenetako bat. 2019ko pandemiaren aurreko zifretara iritsi ez den arren, Euskadin 2.025 ekitaldi egin zirenean, suspertze-prozesu bikainean dago.
Ildo horretan, adierazi zuen EAEko hiru hiriburuetako Convention Bureauxek emandako datuek adierazten dutela iaz 1.720 ekitaldi profesional erregistratu zirela Euskadin, eta 339.912 biltzarkide bildu zirela.
Sailburuak azaldu zuenez, MICE turismoa garrantzitsua da, ez bakarrik profesionalak erakartzen dituelako eta Euskadiren irudi positiboa ematen duelako, baita urtean zehar eta astean zehar urtarokotasuna galtzeko duen gaitasunagatik ere, kongresuak eta azokak ez baitira normalean udan egiten.
Gainera, MICE turismoak helmugaren posizionamenduan duen garrantzia nabarmendu zuen, negozio-aukeren motorra delako eta Euskadiren irudia eta eskaintzen dituen aukerak hobetzen laguntzen duelako. Egokitzeko eta aisialdiko turismo bihurtzeko gaitasuna ere azpimarratu zuen.
Halaber, sailburuak, «Let ‘s MICE» jardunaldiaz ari zela, azpimarratu zuen garrantzitsua dela «begirada ekitaldien ondarera itzultzea», hainbat mailatan onurak eragiten baitizkiote helmugari eta komunitateari. «Onurak ekartzen dizkiote ekonomiari oro har, helmugak birsortzen laguntzen dute, ezagutzaren zabalkundea sustatzen dute, berrikuntza eta sormena bultzatzen dute, eta inplikazio eta balio sozialak ere badituzte», azpimarratu zuen.
Gaur egindako jardunaldiari dagokionez, Hurtadok MICE sektorearen mesedetan aurrera egiten jarraitzeko nahia adierazi zuen, ekitaldi bakoitza sektore garrantzitsuen potentzialtasunak nabarmentzeko eta balioa gehitzeko aukera bat baita.
«Eta ikuspegi etiko batetik egin nahi dugu, ekitaldia garatzen den lekuari balioa emanez, ondare iraunkor bat sortuz. Filosofia horri eusten dio gure Turismoaren Kode Etikoak Euskadin, eta 620 enpresa baino gehiago atxiki zaizkio dagoeneko kode horri «, amaitu zuen Hurtadok.
