Amaia Autor, Ion Fermín Clavero, Idoia Meaza eta Naia Ormazak, UPV/EHUko tituludunek, La Caixa Fundazioa 100 beketik lau lortu dituzte, atzerriko unibertsitate edo ikerketa-zentro ospetsuenetako batzuetan graduondoko ikasketak egiteko. “Emozio asko sentitu nituen hautatuetako bat nintzenean jakitean: harridura, esker ona, baina baita ahalegina areagotzeko eta nire buruan sinesteko adorea eta errekonozimendua ere,” azaldu du Claverok.
Deialdia ikerketa-arlo guztiei zuzenduta zegoen, eta graduondokoak Europako Goi Mailako Hezkuntza Esparruko (GHEE), Ipar Amerikako (AEB eta Kanada) eta Asia-Pazifikoko eskualdeko (Australia, Hego Korea, India, Japonia, Singapur eta Txina) edozein herrialdetan egingo dira. Izan ere, UPV/EHUko ikasleek hainbat diziplina ikasi dituzte eta hainbat destino aukeratu dituzte: Amaia Autorek Zientzia eta Teknologia Fakultateko Biologia gradua ikasi zuen eta graduondokoa Montanako Unibertsitatean (Missoula) egingo du. Idoia Meazak, fakultate berean, Biologia gradua eta Itsas Ingurumean eta Baliabideak Erasmus Mundus Masterra (MER) egin zituen, eta Louisvilleko Unibertsitatean dago, Kentuckyn, bere ikerketa egiten. Aldiz, Ion Fermín Claverok Ekonomia gradua eta Ekonomia: Aplikazio Enpiriko eta Politikak Masterra egin zituen Ekonomia eta Enpresa Fakultatean, eta irailean Chicagoko Northwestern Unibertsitatean hasiko du egonaldia. Eta, azkenik, Naia Ormazak, Zientzia eta Teknologia Fakultatean + Ingeniaritza Elektronikoa Fisika Gradu Bikoitza ikasi ondoren, Coloradoko Boulder Unibertsitatean bere ikerketa-proiektua egingo du.
La Caixa Fundazioaren beka-deialdira hautagai asko aurkezten dira. Baldintzetako bat da 2014ko urtarriletik 2023ko uztailera gradu-titulu bat lortu izana. Gainera, hautaketa aurreko faseetatik igaro behar izan dute, eta, bertan, diziplina eremu berean esperientzia garrantzitsua duten bi ebaluatzailek espediente akademikoak, hautagaien curriculumak, memorian planteatutako ideien «bikaintasuna» baloratu zituzten, besteak beste, originaltasuna, berrikuntza eta proposamenaren eragin potentziala kontuan hartuta. Azken fasea banakako elkarrizketa bat izan zen. Bertan, hautagaien potentziala ebaluatu zuten, pertsona arteko gaitasunetatik abiatuta: argitasuna, diskurtsoaren sendotasuna, ideien artikulazioa, arrazoibide konplexuak eta independenteak aurkezteko trebetasuna, ekintzailetza, lidergoa eta talde-lana.
Garatuko dituzten ikerketetan ebaluatzaileek ikusi zuten originaltasun eta potentzial hori atzematen da. «Nire interes nagusia ingurumen osasuntsua izateko dugun eskubidea aztertzea da, baina klima-aldaketaren, elikagaien segurtasunaren, nekazaritzaren eta ingurumen toxikoen eraginetan jartzen dut arreta. Zer eskubide urratzen diren, poluzio-gune nagusiak zein diren eta dimentsio sozialarekin nola erlazionatuta dauden aztertzen saiatzen naiz «, adierazi du Ormazak. Claverok guztiz desberdina den diziplina bat ikertuko du: «Informazioaren ekonomian eta adimen artifizialaren ezarpenak merkatuen antolaketan, lehiakortasunean eta abarretan izan ditzakeen efektuetan zentratuta nago», azaldu du.
Biek oroitzapen ona dute UPV/EHUn igarotako urteez. Izan ere, irakasle batzuekin harremanetan jarraitzen dute, eta eskerrak ematen dizkiete, Claverok dioen bezala, «jasotako hezkuntza bikainagatik eta mugarik gabeko laguntzagatik». Gainera, ekonomialari gisa prestakuntza emateaz gain, eredu izan direla dio. «Maitasunez eta mirespenez gogoratzen ditut, baina oso maitasun berezia diot Victoria Ateca zenari. Ekonomialari, irakasle eta pertsona bikain horrek duela hilabete gutxi utzi gintuen». «Zorionekoa naiz Zientzia eta Teknologia Fakultatean eman nituen urteengatik. Ezagutu nituen pertsonekiko maitasunez gogoratzen ditut, eta, orain, nire sarearen parte dira», gaineratu du Ormazak. «Nik ikasleak bultzatu nahi ditut irakasleen ezagutzez balia daitezen, gure esanetara egoten direlako ikasgelan bertan eta ikasgelatik kanpo, eta hori ez da ohikoa. Ikaslearen esku dago horri ahalik eta probetxurik handiena ateratzea, karrera sendo eta emankorrak eraikitzeko, etorkizun bikaina izango dutenak», aholkatu du Claverok.
