Barakaldoko Hiri Udalekuak Aste Santuan itzuliko dira aurten ere, 3 eta 11 urte bitarteko haurrentzako 180 plazarekin. Izena emateko epea otsailaren 5ean irekiko da, astelehenarekin, eta otsailaren 9ra arte egongo da zabalik, Barakaldoko Udalaren egoitza elektronikoaren, 010aren, gizarte-etxeen eta kultura-etxeen bidez.
180 plaza eskaintzen dira, Juan Ramón Jiménez (36), El Pilar (72) eta Ibaibe (72) zentroen artean banatuta, apirilaren 2an, 3an, 4an eta 5ean. Jantoki-zerbitzua aukerakoa izango da. Udalekuetan 08:15etik 09:00etara sartuko dira, eta jantokian geratzen ez direnentzat 14:00etatik 14:15era izango da irteera, eta bazkaltzeko zerbitzua erabiltzen dutenentzat 15:00etatik 15:15era. Udalekuak euskaraz egingo dira.
Izen-emateak 010 telefonoaren bidez egin ahal izango dira, kultur etxeetara eta udal gizarte etxeetara deituz edo egoitza elektronikoaren bidez, B@kQ ziurtagiri elektronikoa duten familientzat. Ziurtagiri hori doan eta aldez aurreko hitzordurik gabe lor daiteke Herriko Plazako HAZen. Plazen zozketa otsailaren 13an egingo da. Plazen % 5 dibertsitate funtzionala duten haurrentzat gordeko da, baldin eta Aldundiak gutxienez % 33ko desgaitasuna aitortuta badu.
Kolonian onartuz gero, autolikidazioa bidaliko da aurreinskripzioetan adierazitako helbide elektronikoetara. Beraz, mesedez, adi egon posta elektroniko horri, eta begiratu ohiko postontzia eta spam-postontzia. Jaso ezean, herritarren arretarako bulegoetan, gizarte-etxeetan eta kultura-etxeetan eskatu ahal izango da, edo, bestela, [email protected] helbidearen bidez, adingabearen izena eta esleitutako kolonia adieraziz.
ANAI-ARREBENGATIKO DESKONTUA
Udalekuek deskontuak dituzte jardueran seme edo alaba bat baino gehiago apuntatzean, hori baitzen barakaldarrek egiten zuten eskaera nagusietako bat. Neurri hori 2020an gauzatu zen, eta seme-alaba bakoitzeko familiaren diru-sarreren arabera dagokiona baino tarte txikiagoa aplikatzean zentratzen da. Gainera, udalekuen prezioa progresibitate sozialaren kontzeptuen arabera ezarrita dago, gutxien dutenek gutxiago ordain dezaten, eta errenta txikieneko tarteen artean ez da aldatuko jantokiarekin edo jantokirik gabe. Bai, ordea, errenta handienetarako finkatutako prezioetan: 21,36 euro eta 38 euro (jantokirik gabe), 25,52 euro eta 46,32 euro (jantokia barne).
