Alba Delgado Garapen Iraunkorreko eta Ingurune Naturaleko zinegotziak iragarri du aurten ere Barakaldoko Udalak bat egingo duela klima-aldaketaren aurkako «Planetaren Ordua» ekimenarekin. Naturaren aldeko munduko erakundeak (WWF) bultzatuta, arazo horri buruz ohartaraztea da helburua, eraikin, monumentu, leku enblematiko eta abarretako argiak ordubetez itzaliz.
Zehazki, Barakaldon, Herriko Plazako erloju-dorrea eta Udaletxeko eraikina bihar, larunbata, itzaliko dira, 20:30etik 21:30era.
«Udalak herritarrengandik hurbilen dagoen erakundea gara, eta funtsezko eragileak klima-aldaketaren aurkako borrokan. Barakaldon, Garapen Iraunkorraren eta Ingurune Naturalaren arlotik neurri zehatzak lantzen ari gara, hala nola, ibaiak birnaturalizatzea, hiri-zuhaitzak eta zuhaitz bereziak babesteko ordenantzak edo Ingurumeneko Foro Soziala martxan jartzea «, azaldu du Delgadok.
Gero eta udal gehiagok bat egiten dute «Planetaren Ordua» rekin. Izan ere, 500 udalerri inguru daude ekimenean izena emanda, eta horrek erakusten du tokiko erakunde askok ingurumenarekiko duten konpromiso sendoa.
Alba Delgadok ekimenarekin bat egiteko deia egin die barakaldarrei, etxeetako argiak itzaliz. «2023 inoizko urterik beroena izan da erregistroak daudenetik. Denok jabetu behar dugu daukagun arazo larriaz. Tenperatura globalaren igoera horrek muturreko fenomeno meteorologikoak ekarri ditu, hala nola uholdeak, bero-boladak eta sute suntsitzaileak, gero eta ohikoagoak «, gogorarazi du.
Krisi klimatikoaren ebidentziak soberan daude, eta testuinguru horretan «Planetaren Ordua» -k aukera ematen du ingurumenaren degradazioarekiko kezka eta jarduteko beharra erakusteko.
Izan ere, natura da gure bizi-euskarriaren sistema, behar dugun guztia ematen diguna, arnasten dugun airetik edaten dugun ureraino eta jaten ditugun elikagaietaraino, eta orain defendatu egin behar dugu, gure planetaren osasuna eta, era berean, gure osasuna eta ongizatea babesteko.
