Imanol Pradales lehendakariak harrera egin die gaur Lehendakaritzan Pariseko Joko Olinpiko eta Paralinpikoetan parte hartu zuten euskal kirolari gehienei.
Maialen Chourraut, Pau Echaniz, Miren Lazkano eta Higinio Rivero piraguistak, Iñigo Llopis, Nahia Zudaire eta Mikel Erdozain igerilariak, Ander Cepas eta Iker Sastre mahai-teniseko jokalariak, Bibiane Schulze futbolaria, Naia Laso eta Alain Kortabitarte skaterrak, Virginia Diaz arraunlaria, Asier Garcia, Agurtzane Egiluz, Laura Ugarte eta Naiara Rodriguez gurpildun aulkiko saskibaloi jokalariak, Rakel Mateo triatleta, Oier Ibarretxe boxeolaria, Oier Lazkano txirrindularia, Majida Maayouf, Tessy Ebosele eta John Cabang atletak, Fernando Michelena tiralaria eta Amagoia Arrieta bocciako jokalaria harreran izan dira, Frantziako hiriburuan jokatutako urteko ekitaldi handienean dena eman duten euskal kirolari guztien ordezkari gisa.
Imanol Pradalesek, Ibone Bengoetxea lehen lehendakariorde eta Eusko Jaurlaritzako Kultura eta Hizkuntza Politikako sailburuarekin, Gorka Iturriaga Jarduera Fisikoaren eta Kirolaren zuzendariarekin eta Olatz Legarza Basque Team Fundazioko koordinatzailearekin batera, kirolari guztiak zoriondu ditu Parisen izandako parte-hartzeagatik eta lortutako emaitza onengatik, eta, gainera, bere esperientzia zuzenean ezagutzeko aukera izan du, argazki ofizialaren ondoren kirolariekin izandako topaketa pribatu batean.
Harrera ekitaldian izan dira, halaber, Basque Team Fundazioko patronatuko kideak, Angel Gurrutxaga Euskal Federazioen Batasuneko presidentea eta Joseba Urkiola EiTB Mediako kirol zuzendaria.
Euskal Autonomia Erkidegoak azken hamarkadetako kirolarien ordezkaritza zabalena izan zuen Paris 2024an, bai Joko Olinpikoetan, bai Paralinpikoetan, eta parte-hartze nabarmena izateaz gain, euskal kirolariek lortutako emaitzak oso txalogarriak izan ziren.
Joko Olinpikoetan Euskal Autonomia Erkidegoak 33 kirolari izan zituen; Atlanta 1996az geroztik ordezkaritza handiena izan zuen. Horietatik 18 emakumeak izan ziren (%54,54) eta 15 gizonak (%45,45).
Emaitzei dagokienez, azpimarratu behar da Euskal Autonomia Erkidegoko kirolariek bost domina eta sei diploma lortu zituztela Olinpiar Jokoetan (taldeko kiroletan domina edo diploma bakarra zenbatuta).
Paralinpiar Jokoen kasuan, euskal kirolarien parte-hartzea ere oso handia izan zen. Euskadiko jaiotza-tasaren jaitsierak goi-mailako kirolarien kopuruak behera egingo zuela iragartzen zuen hitzordu olinpikoetan eta paralinpikoetan; hala ere, aurtengo zifrak (13 lehiakide) Beijing 2008ko 11 parte-hartzaileak, Londres 2012ko bostak, Rio de Janeiro 2016ko laurak eta Tokio 2021eko bederatziak gainditu zituen. Parisen, erkidegoko 13 parte-hartzaileetatik sei emakumeak izan ziren (%46,15) eta zazpi gizonak (%53,38).
Emaitzen atalean, hiru domina eta bederatzi diploma zenbatu ziren Joko Paralinpikoetan (diploma bakarra zenbatuz taldekako kiroletan).
