Eusko Jaurlaritzako Lurralde Plangintza eta Hiri Agendako sailburuorde Juan Carlos Abascalek Hiri Birgaitze, Berritze eta Berroneratzeko Taldearen (3R) Urteko Jardunaldiak inauguratu ditu. Jardunaldiak AVS Euskadik eta AVSk antolatu dituzte, Bilboko Udalarekin, Espainiako Gobernuko Etxebizitza eta Hiri Agenda Ministerioarekin eta Etxebizitza eta Hiri Agenda Sailarekin lankidetzan.
Bere hitzaldian, Abascalek bizi dugun garai-aldaketa nabarmendu du, erronka konplexuek markatua, hala nola klima aldaketak, biztanleriaren zahartzeak eta justizia sozialaren eta hiri-jasangarritasunaren arloan aurrera egiteko beharrak, eta azpimarratu egin du erronka horiei elkarlanaren, ezagutza partekatuaren eta epe luzerako ikuspegiaren ikusmoldetik aurre egitearen garrantzia. “Datu egiazkoetan oinarritutako itxaropenetik eta zientziatik bakarrik aurre egin ahal izango diogu beldurrari, eta etorkizun bidezkoagoa eta jasangarriagoa eraiki”, adierazi du sailburuordeak.
Opengela programa, hiri-berroneratzeko eredua
Sailburuordeak Opengela programaren balioa nabarmendu du: Euskadin auzo kalteberak eraldatzen ari den hiri-berroneratze integratuko ekimen aitzindari bat. Programa honek 25 auzo hartzen ditu Euskal Autonomia Erkidegoko 21 udalerritan: 2.750 etxebizitza baino gehiago, horietako % 35 inguru kalteberatasun ekonomikoko egoeran.
Opengelak, energia-efizientzia eta etxebizitzen irisgarritasuna hobetzeaz gain, auzoetako espazio publikoen kalitatea ere hobetzen du, eta, horrela, gizarte-kohesioa eta inklusioa sustatzen ditu. Asmo handiko proiektu honek 170 milioi euroko inbertsioa du, Eusko Jaurlaritzaren funtsetatik, Espainiako Gobernuaren Suspertze, Eraldatze eta Erresilientzia Planetik eta udalen eta jabeen ekarpenetatik datorrena.
“3.200 familiak baino gehiagok jasoko dute zuzenean programa horren onura, eta horrek erakusten du hiri-berroneratzeak hiriak biziberritzeaz gain, komunitate kohesionatuak eta jasangarriak ere sustatzen dituela”, adierazi du Abascalek.
Legealdiko neurriak eta konpromisoak
Eusko Jaurlaritzak, eraldatzeko motor gisa hiriak berroneratzeko konpromisoa hartuta, funtsezko neurri batzuk hartu ditu datozen urteetarako:
- Bultzatu 2050 Hiri Agenda sendotzea, hiri bizigarriagoak, iraunkorragoak eta inklusiboagoak bermatzeko tresna estrategiko gisa, proiektu zehatz eta neurgarrietan oinarrituta.
- Birgaitze integraleko programen irismena handitzea, lankidetza publiko-pribatua eta erakundeartekoa indartuta, kalteberatasun-egoeran dauden auzo eta etxebizitza gehiago hartzeko.
- Trantsizio energetikoa eta jasangarritasuna sustatzea, birgaitze-proiektuetan teknologia garbiak erabilita eta garapen jasangarrirako helburuak (GJHak) beteta.
- Irisgarritasun unibertsala sustatzea hiri-proiektuen diseinuan eta egikaritzean, gero eta zaharragoa den biztanleriaren beharretara egokituta.
- Jabeentzako eta komunitateentzako beharrezko finantzaketa eta laguntza teknikoa ziurtatzea, bereziki sektore kalteberenetan, gizarte-kohesioa indartuta.
- Euskadi hiri-berroneratze integratuaren Europako erreferente bihurtzea, berrikuntzaren, digitalizazioaren eta beste eskualde eta herrialde batzuekiko lankidetzaren bidez.
Etorkizunerako eredua
Abascalek azpimarratu du hiri-berroneratzeak ikuspegi integral batetik heldu behar diela erronkei, hirigintzaren, ingurumenaren, gizartearen eta ekonomiaren arloko irtenbideak txertatuta. “Euskadik aldaketa horren buru izateko konpromisoa eta ikuspegia du, datozen belaunaldientzat ondare jasangarria eta bidezkoa utzita”, esanez amaitu du.
Jardunaldiak adituak eta erakundeetako ordezkariak biltzen ditu, eta talde-lanaren garrantzia indartzen du, hiri jasangarriagoak, inklusiboagoak eta erresilienteagoak eraikitzeko.
