Barakaldoko Garapen Jasangarria eta Ingurumen Naturala arloko zinegotzi Alba Delgadok izapideak hasi ditu bi udal ordenantza berri onartzeko, klima-aldaketa arintzeko jardueren finantzaketa eta hiriko baratze ekologikoen funtzionamendua arautzeko. Bi ekimen horiek aldez aurretik herritarrei kontsultatzeko fasean daude, eta herritarrek udal-webgunearen egoitza elektronikoaren bidez egin ditzakete ekarpenak.
Araudi horiei esker, funtsezko bi tresna izango ditugu Barakaldo berdeagoa eta jasangarriagoa lortzeko. Gaur egun, inork ez du zalantzan jartzen klima aldatzen ari dela, azken bero-boladek erakusten duten bezala, eta erakundeetatik neurriak hartu behar ditugu 2030 Agendan jasotako garapen jasangarriko helburuen ildoan, Delgadok adierazi duenez.
Klima-aldaketaren aurkako ekintzen kasuan, ordenantzaren asmoa da hura arintzen laguntzen duten eta garapen jasangarria eta natura-ingurunearen babesa sustatzen duten programak, proiektuak eta jarduerak diruz laguntzea. Era berean, elkarte-sarearen bidez, barakaldarren parte-hartzea sustatu nahi da klima-krisia arintzeko ekintza eta neurri guztietan.
Delgadok azaldu duenez, etorkizuneko ordenantzan araututako dirulaguntzak norgehiagoka-araubidean emango lirateke, interes orokorrarekin eta egindako ekintzaren udal-eskumenarekin lotutako programak eta ekintzak gauzatzeko helburu zehatza ziurtatuz.
Garapen Jasamgarria eta Ingurumen Naturala arloko zinegotziak azaldu duenez, araudi hori indarrean jarri arte, arlo horrek zuzeneko laguntzak ematen jarraituko du arlo horretan lan egiten duten elkarteentzat. Izan ere, ostegun honetako osoko bilkuran, Ekologistak Martxan elkarteari 15.000 euroko dirulaguntza emateko proposamena egin da.
BARATZEAK EMATEA
Hiri-baratze ekologikoen ordenantzari dagokionez, eremuaren helburua da udal-lursailen erabilera-baimenak arautzea, bai erakundeei, bai bizilagunei, banaka.
Nortasun juridikoa duten elkarte eta erakundeei emandako baimenak lehia askeko araubidez emango dira, dagokion deialdira aurkeztutako proiektuak baloratu ondoren. Deialdi horietan Elkarteen Udal Erregistroan erregistratuta dauden elkarte guztiek parte hartu ahal izatea da asmoa, baratzerako lurraren erabilerak kudeatzeko ingurumeneko hezkuntza-programa bat aurkezten badute udalerriko beste elkarte eta gizarte-kolektibo batzuekin batera.
Bestalde, kupo horietako bakoitzean ematen diren banakako baimenak zozketa bidez emango dirateke, baldin eta interesdunek aipatutako kupoan dauden partzelak baino eskaera gehiago egiten badituzte. Eskatzaileen itxarote-zerrenda bat sortuko litzateke kupoko, esleipen-zozketan suertatutako ordenaren arabera.
Gainera, zaintzeko konpromisoari balioa emateko, dagokion ordenantza fiskalean zehaztuko da lurzati bakoitzaren esleipendunak ordaindu beharreko tasa, eta esleipendunak hobaria jaso ahal izango du, egoera berezien arabera.
